„Мојата трка“ е насловот на овогодинешниот поетски конкурс, кој се роди на ист ден со трката, така да и тој оваа година слави две години. Идејата е втемелена во поетската традиција на Струга, давајќи потврда на името на трката „Трка на поезијата“.
Тричлената комисија составена од д-р Мерсиха Исмајлоска, доктор по филолошки науки, м-р Ивана Андоноска Спасовска, магистер по правни науки, и м-р Биљана Тодоровска, магистер по драматургија, минатогодишен добитник на поетската награда одлучи дека најдобра за оваа година е песната на Ана Стојаноска, насловена „До целта“.
Песната на Стојаноска се изделува од останатите со својата автентичност и сензитивен поетски израз. Користејќи градација, почнува од малечкото „капка студена пот“, за до крајот да прозборува за победата, и колку таа е лична односно колективна. Таквата победа ги содржи трките или борбите на предците, оние кои и најмногу бодрат со својот дух, за конечниот победник да е љубовта. Таа е целта и крајната смисла. Таа е светлината и Светулката. Потсетник колку суптилно може да се зборува за мојата, нашата трка. Заборавените легенди и те како можат да бидат моќни, кога некој ќе ги насети, особено со стих, онака како што прави Стојаноска.
