Дваесет и осмото коло од англискиот Чемпионшип беше затворено со дербито на североисточна Англија помеѓу Сандерленд и Мидлсброу.
Имено, Сандерленд дојде до победа од 2-0 што претставува негов прв триумф во лигашките дербија после петнаесет години.
Пресудниот момент на натпреварот беше црвениот картон на гостинскиот дефанзивец, Даел Фрај (49′), на почетокот на второто полувреме.
Неговиот фаул им донесе пенал на ,,Црните мачки”, кој првично беше неуспешно изведен од Рос Стјуарт, но Шкотланѓанецот ја смести одбиената топка во противничката мрежа за неговиот десетти овосезонски погодок.
До крајот, навивачите на ,,Стадионот на светлината” прославија уште еден гол, постигнат од Амад Дијало (81′) на девет минути пред крајот.
На табелата, Мидлсброу падна на шестата позиција, додека Сандерленд е деветти, со само бод заостаток во однос на плејоф-зоната.
