Екипата на Зираат Банкаши од Анкара дојде на чекор до својата втора клупска титула во турската одбојкарска Ефелер лига.
Имено, во финалето, актуелните шампиони поведоа со вкупни 2-0 против градскиот ривал, Халкбанк, добивајќи го вториот меч со 3-1.
Номиналните домаќини беа подобри во финишот на првиот (25-23), на третиот (25-21) и на четвртиот сет (25-23), а покажаа инфериорност само во втората партија (15-25).
Од избраниците на Мустафа Каваз, најефикасен беше Воутер Тер Маат со 23 поени, а по 10 додадоа Мартин Атанасов и Бедирхан Булбул.
На спротивната страна, 23 пати поентираше Рамос Фернандо Хернандез, кој ја направи и колосалната сервис-грешка на втората меч-топка на Зираат.
Освен него, двоцифрени кај Халкбанк беа Николас Бруно и Греам Виграс со 12, односно со 13 поени.
Во попладневниот термин, Фенербахче го совлада Аркасспор со 2-3 и со вкупни 2-0 го освои третото место.
