За првпат после периодот од 1979 до 1985, екипата на Њујорк Ајландерс успеа да избори две последователни учества во полуфиналето на НХЛ.
Имено, во четврт-финалната серија, Ајландерс ги елиминираа Бостон Бруинс со вкупен резултат од 4-2.
На последниот меч, претставниците на ,,Големото јаболко” триумфираа со навидум убедливи 6-2 после голема борба.
Во првите дваесет минути, двете екипи по еднаш ја затресоа противничката мрежа со тоа што Тревис Зејџек стрелаше за Ајландерс, а Бред Маршан за Бруинс.
Клучен период за триумфот на домаќините беше вториот, кој го добија со 3-0, откако двоен стрелец беше Брок Нелсон, а еднаш погоди и Кајл Палмиери.
На почетокот на третата третина, Маршан, со вториот гол на натпреварот, намали на 4-2 и внесе неизвесност во самиот финиш.
Сепак, поради ризичната стратегија со шести играч во поле, односно со празен гол, Бруинс примија уште два погодоци, кои беа дело на Кал Клатербак и на Рајан Палок.
По вторпат во низа, Ајландерс, во полуфиналето, ќе ги одмерат силите со Тампа Беј Лајтнинг, кои минатата година се закитија со освоен Стенли Куп.
