По вторпат во седум дена, во НБА лигата, се соочија Њу Орлеанс Пеликанс и Оклахома Сити Тандер.
Во првиот меч, Пеликанс беа убедливи на гостински терен со 80-113, а синоќа минимално изгубија дома со 110-111.
Натпреварот беше тесен цело време, со пресврти и на двете страни, а единствената двоцифрена предност ја имаше Окхалома во последните минути од третата четвртина.
Поранешниот прв пик на драфтот, Зајон Вилијамсон (Њу Орлеанс) беше најефикасен на мечот со 29 поени, а дабл-дабл и трипл-дабл запишаа неговите соиграчи Брендон Инграм (24 поени и 11 скокови) и Стивен Адамс (10 поени, 11 скокови и 10 асистенции).
Во составот на Оклахома, најпрецизен беше Шеј Гилџус-Александер со 21 поен, а дабл-дабл од 20 поени и од 12 скокови постигна Дариус Безли.
Со новиот триумф, Оклахома со учинок од 3-4 се доближи до плејоф-зоната, додека вториот врзан пораз ги остави Пеликанс на четвртото место со 4-4.
📸 NBA
