По дванаесетти пат во низа, единаесеткратниот македонски лигашки шампион, Вардар, успеа да се квалификува во осмина-финалето на Купот на Македонија.
Имено, ,,Црвено-црните”, денес, на стадионот ,,Гоце Делчев” во Прилеп, пред бројна публика, ја поразија домашната екипа на Победа после пенали.
Стрелец на првиот гол на натпреварот беше Дејан Блажевски (54′), кој испрати вистински проектил од слободен удар од триесетина метри и му донесе почетна предност на Вардар.
Надежите на Победа за израмнување, односно за пресврт, драстично се намалија во 73. минута, откако останаа со десетмина на теренот поради црвен картон.
Сепак, во судиското продолжение, иако беа со играч помалку, домаќините успеаја да постигнат изедначувачки погодок преку капитенот Филип Стонмароски (90+4′).
Во пенал-серијата, после четири стопроцентни удари од белата точка, трагичар за Победа беше Анатолиј Петејчук, кој шутираше во голманот на Вардар – Филип Илиќ.
