Вториот натпреварувачки ден во Рука, Финска, беше одбележан со првата победа во Светскиот куп на Словенецот Анже Ланишек.
Ланишек, во првата серија, скокна 147 метри што е само за половина метар пократко од рекордот на скокалницата, додека пред вториот обид, беше принуден да чека неколку минути додека да се смират бочните налети на ветрот.
На втората позиција заврши водечкиот во генералниот пласман, Карл Гајгер, додека третото место му припадна на Маркус Ајзенбихлер.
Мариус Линдвик беше најдобар Норвежанец на четвртата позиција, а уште двајца Словенци, браќата Цене и Петер Превц, се пласираа во топ 6.
Конкуренцијата во пресрет на првата серија беше ослабната поради отсуството на актуелниот шампион, Халвор Егнер Гранеруд, кој не ги помина квалификациите и на вчерашниот победник, Рјоју Кобајаши, кој доби позитивен тест на КОВИД-19.
Од фаворитите, во првата серија потфрлија уште Јукија Сато, Камил Штох, Роберт Јохансон и Давид Кубацки.
