По вторпат во тековната сезона, Питсбург Стилерс беа поразени во дивизискиот дуел со Синсинати Бенгалс, откако во дванаесеттото коло загубија со убедливи 41-10.
Уште во првото полувреме, Бенгалс делумно ја остварија својата цел со тоа што водеа 31-3 во пресрет на првата пауза.
Од играчите на Стилерс, освен шутерот Крис Босвел, поени запиша само тајт-ендот Пет Фрајермут.
Нивниот квотербек, Бен Ротлисбергер, уфрли еден тачдаун и две пресечени додавања, а го заврши мечот со 263 јарди од 24/41 прецизни пасови.
На спротивната страна, Џоу Бароу постигна два тачдауни (еден со фрлање и еден со пробивање) и освои 190 јарди од 20/24 обиди за додавање.
Од фаќачите, Ти Хигинс одигра неверојатна партија со еден тачдаун и со 114 освоени јарди, а топката во енд-зоната ја внесоа уште Џоу Миксон (х2) и Мајк Хилтон.
Со учинок од 7-4, Синсинати скокна на петтото место во АФК, додека Питсбург (5-1-5) падна на дванаесеттата позиција.
*Во соработка со НФЛ Македонија*
