Пред само два дена, Динамо Москва гостуваше во Хабаровск, на пат поголем од осум илјади километри, каде што ја победи екипата на Амур со 2-6.
Денес, претставниците на главниот град на Русија беа над девет илјади километри далеку од дома, односно играа во Владивосток против Адмирал и триумфираа со 3-5.
За нив, ова беше единаесетта победа на последните дванаесет меѓусебни средби, односно петти последователен триумф во новата сезона.
Најпрво, Адмирал поведе преку Вјачеслав Ушенин во завршницата на првиот период, а после една минута во втората третина, Динамо израмни на 1-1 со голот на Дмитри Рашевски.
Од средината на вториот дел, па сè до три минути пред крајот на натпреварот, двете екипи уште по двапати ја затресоа противничката мрежа.
Имено, двоен голгетер за Адмирал беше Марк Верба, кој потекнува од школата на Динамо, додека за гостите стрелаа Станислав Галиев и гореспоменатиот Рашевски.
Во последните седумдесет секунди игра, ,,Сините” дојдоа до конечниот триумф, благодарение на Николај Чебикин и на најдобриот поентер во досегашниот тек на КХЛ – Вадим Шипачјов.
Освен голот, Шипачјов запиша уште две асистенции и стана најдобриот асистент во историјата на КХЛ со дури 510 додавања за погодок.
На Западот, Динамо Москва е единствен тим со стопроцентен учинок после пет средби, додека Адмирал е десетти на Истокот, но сè уште ја чека првата овосезонска победа.
