На првото натпреварување во Планица во рамките на Светскиот куп во ски летови, домашните натпреварувачи ги освоија првите четири позиции.
До првиот триумф во својата кариера дојде Жига Јелар, кој во втората серија го имаше најдолгиот лет од 239 метри.
Како второпласиран заврши Петер Превц, а подиумот го комплетираше Анже Ланишек.
За Словенија, ова беше трет троен подиум во историјата и прв после 30 јануари 2016, кога Петер Превц, Домен Превц и Роберт Крањец беа на врвот во Сапоро (Јапонија).
Лидерот после првиот дел и новиот светски вицешампион во ски летови, Тими Зајц, го освои четвртото место, а првопласираниот во Светскиот куп, Рјоју Кобајаши, беше петти.
Со киксот на Карл Гајгер на единаесеттата позиција, Кобајаши го зголеми своето водство во вкупниот поредок на 87 поени на едно натпреварување пред крајот на сезоната.
Во првите десетмина завршија уште: Штефан Крафт, Домен Превц, Јукија Сато, Халвор Егнер Гранеруд и Мануел Фетнер.
