Во второто полуфинале на АО 2021, Даниил Медведев го порази Стефанос Циципас со убедливи 3-0 (6-4, 6-2, 7-5), после два часа и дванаесет минути игра.
Русинот го запиша јубилејниот дваесетти триумф во низа, односно единаесетти над тенисерите што ги држат првите десет позиции на АТП ранг-листата.
Имено, во првиот сет, Медведев направи еден брејк, а во наредните два, успеа да освои по два гемови на противнички сервис.
Од друга страна, Циципас беше тотално надигран во гемовите во кои сервираше Медведев и успеа да дојде само до еден брејк во третиот сет.
Со пласманот во првото финале на првиот грен-слем во годината, Медведев стана 103. различен финалист во историјата на Аустралиан Опен.
Во борбата за титулата, четвртиот тенисер на светот ќе ги одмери силите со Новак Ѓоковиќ, кој вчера го совлада Аслан Карацев со 3-0.
📸 Matt King/Getty Images
