Последното коло од англиската Лиг 1 ги реши сите дилеми кога се во прашање директната промоција, пласманот во плејофот и релегацијата.
Имено, после двегодишно отсуство, во Чемпионшип, како третолигашки шампион, се враќа екипата на Виган, која вчера го порази Шризбери со 0-3.
Гостите стекнаа водство со автоголот на Џош Вела (43′), а во вториот дел, двапати погоди Вил Кин (50′ од пенал, 65′), кој го освои и првото место во листата на стрелците со 26 голови.
Втората позиција на табелата ја зазеде Ротерам, откако го порази Џилингем со 0-2 со головите на Рармани Едмондс-Грин (34′) и на Џорџи Кели (89′).
Популарните ,,Милерс” уште еднаш го оправдаа епитетот на јо-јо клуб со тоа што по шести пат во последните шест сезони се преселија од една во друга лига.
Во битката за директен пласман, на пораз на двата горенаведени ривали се надеваа МК Донс, кои накрај завршија на третото место и покрај победата од 0-5 над Плимут Аргајл.
Четири гола за Донс постигна Скот Твајн (17′, 40′, 60′, 77′), а еднаш погоди Хари Дарлинг (43′).
Во претходните дваесет и два натпревари на домашен терен, Плимут прими само четиринаесет голови, но со вчерашната ,,петарда” во најважниот меч, ги загуби шансите за плејоф и заврши на непосакуваното седмо место.
Овој резултат му отиде во прилог на Викомб, односно на тимот што славеше кај Бартон Албион со 1-2.
Најпрво, Сем Воукс (43′) им донесе водство на Вондерерс, Гасан Јајаи (72′) израмни на 1-1, а за победа и за плејоф стрелаше Џордан Обита (85′) на пет минути пред крајот.
На четвртата позиција на табелата се пласираше уште еден минатосезонски второлигаш, Шефилд Венздеј, кој го победи Портсмут со 4-1.
Портсмут поведе на стартот преку Џорџ Хирст (4′), а славјето на ,,Утките” го донесоа Ли Грегори (17′), Саидо Бераињо (36′), Џордан Стори (40′) и Џорџ Бајерс (86′).
Противник на Венздеј во првата рунда од доигрувањето ќе биде петтопласираниот Сандерленд.
,,Црните мачки” во последното коло рутински ја оправдаа фаворитската улога и го добија Моркемб со 0-1, благодарение на Нејтан Бродхед (10′).
Гореспоменатиот Џилингем, кој загуби од Викомб, беше најнесреќниот тим на денот, бидејќи беше прв ,,под цртата” и отпадна од третата лига само поради полошата гол-разлика од Флитвуд.
Во ,,црвената” зона, уште од претходно, се наоѓаа екипите на Донкастер, на Вимблдон и на Кру Александра, чиишто места со сигурност ќе ги заземат Ексетер и Форест Грин.
Последното коло исто така го одбележа и еден од најчудните погодоци во ,,режија” на Дион Чарлс (86′) од Болтон во победата од 4-2 над Флитвуд.
