Актуелните вицешампиони, Феникс Санс, имаат неверојатна серија од седумнаесет последователни победи што претставува израмнување на рекордот на франшизата.
Синоќа, претставниците на Аризона, во дербито на Западот, ги поразија Голден Стејт Вориорс со 104-96.
Натпреварот беше изедначен во текот на сите четири четвртини со тоа што првата двоцифрена предност ја имаа Санс во завршните минути.
Домаќините, кон крајот на втората четвртина, останаа без Девин Букер, кој ја напушти играта поради повреда на задната ложа.
На спротивната страна, проблем за Голден Стејт беше Стеф Кари, кој статистички го одигра најнепрецизниот меч во својата кариера со 4/21 погодени шутеви од игра (19%) за вкупно 12 поени.
Сепак, Кари беше трет стрелец на Вориорс, а пред него се најдоа Ото Портер (16 кошеви) и Џордан Пул (28 кошеви).
На спротивната страна, дабл-дабл запишаа двајца кошаркари, односно Деандре Ејтон (24 поени и 11 скокови) и Крис Пол (15 поени и 11 асистенции).
Нанесувајќи им го третиот овосезонски пораз на Вориорс, Феникс Санс се израмнија на првото место на Западот со истите ривали, со учинок од 18-3.