Екипите на Тампа Беј Рејс и Торонто Блу Џејс се соочија во нивниот прв натпревар од новата МЛБ сезона.Домаќините од Флорида, на својот ,,Тропикана Филд” претрпеа пораз од 4-6 од гостите од Канада. Имено, Торонто дојде до победата преку поените постигнати само во четвртиот и петтиот ининг. Во петтиот ининг, хоум-ранот на Каван Биџио донесе вкупно три поени поради двете претходно заземени бази, а ист број на поени освоија и во претходниот ининг.Од друга страна, Тампа Беј освои еден поен во четвртиот и во осмиот односно два поени во петтиот ининг.
Овој натпревар влезе во историјата како прв на којшто сите инфилдери на еден тим (во овој случај на Торонто) се синови на поранешни „Ол-Стар“ играчи. Овде спаѓаат: Тревис Шоу (син на Џеф Шоу – двапати избран во МЛБ „Ол-Стар“ тимот), Бо Бишет (син на Данте Бишет – четири пати избран во МЛБ „Ол-Стар“ тимот), Каван Биџио (син на Крег Биџио – „хол оф фејмер“ и седум пати избран во „Ол-Стар“ тимот) и Владимир Гереро Јуниор (син на Владимир Гереро Сениор – „хол оф фејмер“ и девет пати избран во „Ол-Стар“ тимот).
