Во првиот меч од четиринаесеттото коло на шкотскиот Премиершип, Абердин го совлада Хиберниан со 4-1.
Пресвртна точка на овој натпревар беше погодокот од пенал за 1-0 на македонскиот интернационалец, Бојан Миовски (45+8′), длабоко во судиското продолжение на првото полувреме.
На стартот на вториот дел, Миовски (53′) ја удвои предноста на домаќините и изби на второто место на листата на стрелците со десет овосезонски погодоци.
Само осум минути подоцна, Илбер Рамадани (61′) зголеми на 3-0, пред Микола Кухаревич (69′) да го намали гостинскиот дефицит.
На тринаесет минути пред крајот, Лејтон Кларксон (77′) го постави конечниот резултат, а со асистенцијата кон Миовски при вториот гол, заработи и награда за играч на натпреварот.
На табелата, Абердин го презеде третото место токму од Хиберниан, кој падна на четвртата позиција.
