Во сезоната 1973/74, предводени од легендарниот Карим Абдул-Џабар, Милвоки Бакс се пласираа во финалето на НБА, каде што беа поразени од Бостон Селтикс со 4-3.
Синоќа, после пауза од речиси половина век, претставниците на Висконсин повторно се најдоа во големото финале, во кое ќе ги вкрстат копјата со Феникс Санс.
Во полуфиналето, Бакс триумфираа над Атланта Хокс со вкупен резултат од 4-2.
Последниот, односно шестиот меч од меѓусебната серија, одигран во Атланта, заврши во корист на Милвоки со 107-118.
Победниците водеа во поголемиот дел од натпреварот, но клучна за победата беше серијата од 13-0 на почетокот на второто полувреме.
Во редовите на Хокс се врати Тре Јанг, кој запиша скромни 14 поени, додека кај Бакс повторно отсуствуваше Јанис Антетокумбо.
Од составот на ,,Јастребите”, најефикасни беа Кем Редиш и Богдан Богдановиќ со 21, односно со 20 поени, додека дабл-дабл имаше Џоу Колинс (13 поени и 11 скокови).
На спротивната страна, Крис Мидлтон и Џру Холидеј беа одговорни за 32, односно за 27 кошеви на Бакс.
