Финалната серија на КХЛ е израмнета на 1-1, откако во вториот меч, Металург Магнитогорск ја совлада ЦСКА Москва со 6-4.
Сè до средината на втората третина, головите паѓаа по наизменичен редослед, пред Металург да направи серија од 3-0 за водство од 6-3.
Имено, денешната втора третина беше историска бидејќи во неа паднаа дури седум голови што претставува нов рекорд кога е во прашање финалето на КХЛ.
За домаќините стрелаа шест различни хокеари, односно Филип Маје, Линус Хултстром, Архип Неколенко, Денис Зернов, Брендан Лајпсик и Николај Голдобин.
На спротивната страна погодија Витали Абрамов, Михаил Григоренко, Антон Слепишев и Константин Окулов.
За два дена ќе биде одигран и третиот финален натпревар, а истиот ќе се одвива во Москва со почеток од 18.30 часот по македонско време.
