Последното четириесет и шесто коло на англискиот Чемпионшип само ја завери ситуацијата на табелата и ги потврди патниците во Премиер лигата, во плејофот и во Лиг 1.
Шампионот Фулам остана на првата позиција и покрај убедливиот пораз од 4-0 на гостувањето кај Шефилд Јунајтед, кој заврши на петтото место со обезбеден плејоф.
Стрелци за момците од ,,Брамал Лејн” беа Морган Гибс-Вајт (10′), Илиман Ндиаје (21′), Сандер Берге (25′) и Енда Стивенс (49′).
Во полуфиналето, Шефилд Јунајтед ќе ги одмери силите со Нотингем Форест, кој заврши на четвртото место поради ремито од 1-1 против Хал Сити.
На овој натпревар, головите паднаа во судиското продолжение со тоа што предност на Форест му донесе Бренан Џонсон (90+2′) од пенал, а за ,,Тигрите” израмни Кин Луис-Потер (90+4′).
Со вицешампионскиот наслов и со враќање во ПЛ се закити Барнмут, совладувајќи го Милвол со 1-0, благодарение на Кифер Мур (81′).
Третото место на табелата го освои Хадерсфилд, искористувајќи го ремито на Нотингем и победувајќи го Бристол Сити со 2-0, благодарение на Хари Тофоло (33′) и на Дени Ворд (44′).
Противник во двомечот од доигрувањето на ,,Териерите” ќе им биде Лутон, односно тимот што го совлада Рединг со 1-0.
,,Шеширџиите” дојдоа до победата со комичниот гол на Хари Корник (45+1′), кој итро го надмудри противничкиот голман – Орјан Ниланд.
Последното место на табелата го зазеде Барнсли, губејќи од ВБА со 4-0, додека претпоследен беше Дерби Каунти.
Фудбалерите предводени од Вејн Руни се соочија со бројни санкции и со казна од дваесет и еден поен, а во последното коло загубија од Кардиф со 0-1 преку погодокот на Џордан Хјуџил (55′).
Сепак, навивачите ги преполнија трибините на ,,Прајд Парк” и ги испратија своите миленици со громогласен аплауз после натпреварот.
Како најдобар од трите релегирани тимови заврши Питерборо Јунајтед поради денешниот триумф од 5-0 над Блекпул.
Двоен голгетер за ,,Пош” беше Семи Смодич (62′, 71′), а мрежата на Кристофер Максвел по еднаш ја затресоа Џонсон Кларк-Херис (36′), Џек Мериот (85′) и Џек Тејлор (89′).
Во наредната сезона, во Чемпионшип ќе играат по три екипи од Премиер лигата и од Лиг 1, а засега, познати патници се Норвич, Вотфорд, Виган и Ротерам Јунајтед.
