Потполно лудило ја одбележа трката во велеслалом на тековното Светско првенство во алпско скијање во Кортина д’Ампецо.
Имено, до втората светска титула во само два дена дојде Французинот Матје Февр (2:37,25), кој беше четврти после првата серија.
Франција немаше светско злато во велеслалом од 1968, кога Жан-Клод Кили беше најдобар на ЗОИ, кои воедно го претставуваа и Светското првенство.
Првиот медал на домашната селекција во машка конкуренција изненадувачки ѝ го донесе Лука Де Алипрандини (+0,63), кој го зазеде одличното второ место.
Славјето не изостануваше ни во австрискиот тим, каде што, Марко Шварц (+0,87), со новата бронза, го донесе четвртото одличје на петте досегашни трки.
Во продолжение, сите скијачи заостануваа над една секунда, а во топ 10 се пласираа уште: Филип Зубчиќ (+1,59), Лоик Мејар (+1,77), Жан Крањец (+1,83), Штефан Луитц (+1,99), Адам Жампа (+2,48), Хенрик Кристоферсен (+2,53) и Роланд Лајтингер (+2,87).
Најголем трагичар беше Алексис Пантуро, кој потполно ја ,,уништи” конкуренцијата во првата серија, но поради грешка во втората, остана без пласман.
Иста судбина имаше и третопласираниот после првото скијање – Александер Шмид.
📸 Cortina 2021 / Pentaphoto