Екипата на Дерби Каунти направи херојски подвиг и во 24. коло од англискиот Чемпионшип го совлада ВБА со минимални 1-0.
,,Овните” на Вејн Руни важеа за потполни аутсајдери со оглед на фактот дека недостасуваа четири стартери, но публиката, која броеше над 25 000 гледачи, не дозволи да се почувствува инфериорноста на домаќинот.
ВБА доминираше во текот на цел натпревар, но не успеа да ја затресе противничката мрежа.
Најблиску до погодок од гостинскиот состав беше дефанзивецот Кајл Бартли, чијшто удар со глава во петтата минута од судиското продолжение беше фантастично одбранет од Рајан Алсоп.
Од друга страна, единствен стрелец за Дерби беше Колин Казим-Ричардс (58′), кој ја искористи грешката во одбраната на Седрик Кипре и на голманот Сем Џонстон, само една минута откако влезе во игра.
Со првиот пораз после пет средби, ВБА остана на четвртото место на табелата, додека и покрај трите поени, Дерби е последен поради казната од 21 одземен бод.
