Во 34. коло од јапонската Ј1 Лига, Кавасаки Фронтале ја завери својата втора титула во низа, односно четврта во клупската историја.
Имено, момците од ,,Кавасаки Тодороки Стадиум”, на домашен терен, ремизираа со 1-1 против Урава Редс во дербито на колото.
Најпрво, Јесиел (33′) им донесе водство на домаќините, а Хироки Сакаи го постави конечниот резултат во 89. минута.
Денешното реми само ќе го одложеше славјето на Кавасаки, доколку најблискиот ривал, Јокохама Маринос, во истото коло дојдеше до нова победа.
Сепак, фудбалерите на Кевин Маскат не успеаја да ги задржат теоретските шанси за петтата историска титула, бидејќи загубија со 0-1 од Гамба Осака.
Стрелец на единствениот погодок, кој ги сруши надежите на Маринос, беше Шу Курата во 55. минута, преку единствениот шут во рамките на голот на својот тим.
На четири кола пред крајот, Кавасаки има предност од тринаесет бодови во однос на Јокохама Маринос, на кои им се потребни само два поени за заверување на второто место, односно за пласман во азиската ЛШ.
