Англискиот второлигаш Хадерсфилд Таун реши да ги засили своите офанзивни редови со највисокиот фудбалер во историјата на англискиот фудбал.
Имено, во составот на ,,Териерите” беше доведен 22-годишниот напаѓач, Кајл Хадлин, кој е висок неверојатни 206 сантиметри.
Претходниот рекорд во англиските професионални лиги го држеше легендарниот Питер Крауч, чијашто висина изнесува 201 сантиметар.
Хадлин дојде во Хадерсфилд од петтолигашот Солихал Мурс за засега непозната сума и потпиша договор на две години со опција за уште една дополнителна сезона.
Во наредната сезона, новиот англиски феномен ќе игра за Б тимот на Хадерсфилд, но се очекува да добие шанса и во сениорскиот дрес.
Минатата сезона, Англичанецот постигна шеснаесет голови во Националната лига, а претходно настапуваше за нисколигашите Болдмер Спортс, Сошал Фалконс и Солихал Јунајтед.
