Двете екипи, кои приредија најпозитивни изненадувања во тековната НРЛ сезона, НК Каубојс и Кронула Шаркс, се соочија во рамките на првиот меч од осумнаесеттото коло.
Имено, Шаркс дојдоа до петтиот триумф во низа, славејќи со 12-26 и притоа прекинувајќи ја серијата од четири победи на своите ривали.
Во првото полувреме владееше неизвесна игра со 12-14 во корист на гостите, кои со низата од 12-0 во вториот дел го поставија конечниот резултат.
За ,,Каубоите”, по еден есеј постигнаа Кајл Фелдт (24′) и Хамисо Табуаи-Фидоу (38′), а двата шута прецизно ги изведе Чед Таунсенд.
На спротивната страна, четири конверзии и еден пенал погоди Николас Хајнс, а топката во противничката енд-зона ја внесоа Џеси Ремиен (3′, 20′), Тиг Вилтон (59′) и Сионе Катоа (69′).
На табелата, двете екипи се изедначени на второто место со по дваесет и четири освоени бодови.
