Екипата на Глазгов Ренџерс, предводена од Стивен Џерард, доминантно, без пораз после првите 35 кола, по десет години пауза ја освои шкотската Премиер лига.
„Полицајците“, со потентната игра, се надеваа дека конечно ќе стигнат и до двојна круна со триумф во Шкотскиот Куп, посебно, откако во осмина-финалето, го елиминираа градскиот ривал Селтик.
Сепак, надежите на „Сините“ отидоа во неповрат после поразот во четврт-финалната рунда од Ст. Џонстон.
Имено, на стадионот „Иброкс“, гостите од Перт приредија огромна сензација славејќи на пенали, откако претходно израмнија во последните секунди од продолжението.
На мечот, после регуларниот дел, резултатот гласеше 0-0, а во 117. минута, Џејмс Таверниер го постигна навидум победничкиот погодок на Ренџерс.
Тоа само ги мотивираше гостите да тргнат во напад и да израмнат на 1-1 со голот на голманот Зандер Кларк (122′) и да обезбеди пенали.
Истиот човек се покажа како клучен и во пенал-серијата, одбранувајќи го првиот удар од белата точка на стрелецот на првиот гол – Таверниер.
До крајот, за Ренџерс промаши и Кемар Руф, додека четирите прецизни фудбалери на Ст. Џонстон беа Лиам Крег, Калум Бут, Џејсон Кер и Алистер МекКен.
📸 Ian MacNicol/Getty Images



