Првите медали на ЗОИ 2022 во Пекинг им беа доделени на дамите од крос-кантри конкуренцијата, кои се тркаа на скијатлон од 15 километри (7,5 км во класичен и 7,5 км во слободен стил).
На средината на трката, после промената на скиите, Терезе Јохауг (44:13,7) се издвои од водечката група и продолжи сама кон златниот медал.
За најголемата фаворитка, денешното злато беше само второ на Олимписките игри во кариерата, после штафетното прво место од Ванкувер 2010.
На втората позиција заврши Русинката Наталија Непрјаева (+30,2), освојувајќи го првото олимписко сребро во кариерата.
Третото место, после голема борба со Непрјаева, го освои 29-годишната дебитантка на олимпискиот пиедестал – Австријката Тереза Штадлобер (+30,5).
Од скијачките во водечката група од првата половина, во топ 5 завршија уште Керту Нисканен (+36,1) и Фрида Карлсон (+42,5), а под една минута доцнеа Џеси Дигинс (+50,5) и Криста Пармакоски (+58,4).
Поради ситуацијата со КОВИД-19, ФИС го лимитира бројот на скијачки на денешната трка при што, македонската претставничка, Ана Цветановска, не доби дозвола за настап.
