Новајлијата во лигата, Сиетл Кракен, ја имаше честа да го игра својот прв натпревар во НХЛ уште во првиот ден од новата сезона.
Имено, Кракен, на своето деби во најквалитетната хокеарска лига, запишаа пораз од Вегас Голден Најтс со 4-3.
Домаќините на овој меч се дел од НХЛ од 2017/18, но со доаѓањето на франшизата од Сиетл, станаа втор најмлад тим во лигата.
На мечот, Голден Најтс, заклучно со почетокот на втората третина, стекнаа навидум убедливо водство од 3-0 со головите на Макс Пачорети (х2) и на Џонатан Маршесолт.
Сепак, во интервал од неполни дваесет минути, гостите успеаја да израмнат на 3-3.
Првиот гол во историјата на Кракен го запиша Рајан Донато, а како втор, односно трет стрелец, ќе останат запаметени Џеред МекКен и Морган Гики.
Само триесет и пет секунди по голот на Гики за 3-3, Вегас дојде до ново водство, односно до првата овосезонска победа, откако Чендлер Стивенсон со нога го надмудри Филип Грубауер.
