Последниот слалом од календарската 2022 во рамките на Светскиот куп во алпско скијање се одржа по ноќни услови во Мадона ди Кампиљо, Италија.
На него, до триумф дојде четвртиот после првата серија, Даниел Јул (1:37,67), кој се покажа како вистински крал во северна Италија.
Имено, Швајцарецот има вкупно пет победи во кариерата, а дури три од нив, вклучувајќи ја и денешната, беа остварени на патеката ,,Каналоне Мирамонти”.
Норвежанецот Хенрик Кристоферсен (+0,08) се искачи на втората позиција, а Германецот Линус Штрасер (+0,18), кој стана татко на претходниот слалом во Вал д’Изер пред десет дена, денес ја круниса својата среќа со освоеното трето место.
Иако се чинеше дека ја има контролата во свои раце, лидерот после првиот круг, Лукас Бротен (+0,27), мораше да се задоволи со четвртата позиција пред австриското дуо – Мануел Фелер (+0,53) и Марко Шварц (+0,79).
Најголем трагичар беше второпласираниот после првиот дел, Лоик Мејар, кој поради грешка не ја заврши втората серија.
