Најстариот професионален клуб од Велс, Рексам и најстариот професионален клуб од Англија, Нотс Каунти, водат рововска битка во Националната лига.
Имено, двете екипи се борат за титулата, убедливо оставајќи ги зад себе сите конкуренти, рушејќи бројни рекорди како први тимови во постоењето на првенството со над сто бодови.
Во четириесет и третото коло, на меѓусебниот дуел на ,,Рејскурс Граунд” во Велс, Рексам победи со 3-2 во убедливо најголемиот натпревар во историјата на петтата лига.
Во финишот на првото полувреме, со првиот гол после 2016, водство на гостите од Нотингем им донесе Џон Босток (45+4′) со фантастичен шут од слободен удар.
На стартот на вториот дел, Пол Малин (50′), со триесет и петтиот погодок сезонава, му донесе израмнување на домаќинот, кој набргу поведе преку Џејкоб Менди (69′).
Иако Малин е најдобар стрелец на својот тим, сепак не го држи првото место во лигата, бидејќи најефикасниот голгетер, Мекоули Лангстаф постигна четириесет и еден гол токму за Нотс Каунти.
Шест минути по водството на ,,Црвените”, израмнување на ,,Страчките” им донесе капитенот Кајл Камерон (75′).
Радоста на ,,Црно-белите” траеше само три минути бидејќи Елиот Ли (78′) им донесе конечно славје на домашните навивачи.
Сепак, најголемиот делириум на трибините го предизвика голманот Бен Фостер, кој длабоко во судиското надополнување му одбрани пенал на Кедвин Скот (90+7′) и ги остави трите бода во Рексам.
Имено, Фостер е познат по своето премиерлигашко искуство, а кај новите лидери на Националната лига пристигна пред само две недели, откако се врати од пензија.
На табелата, со натпревар и со три бода повеќе во однос на денешниот ривал, Рексам го држи првото место.
Од лигата, само првопласираната екипа изборува директна промоција во Лиг 2, додека тимовите од второто до седмото место играат плејоф.
Рексам чека промоција цели дваесет години, откако веќе шеснаесет сезони е ,,заглавен” во петтата дивизија, додека Нотс Каунти се надева на повраток во професионалниот фудбал после тригодишно отсуство.
