Во премиерата на петнаесеттото коло од тековната НРЛ сезона, Саут Сиднеј Рабитохс ги декласираа Бризбејн Бронкос со убедливи 0-46.
За домаќините, ова беше прв пораз со ,,нула” после 17 јули 2020, кога загубија со 48-0 од Вестс Тигерс.
Од друга страна, Рабитохс не примија поен за првпат после четвртото овосезонско коло, кога ги поразија Кантербери Булдогс со 0-38.
Денес, ,,Зајаците” го добија првото полувреме со 18-0, а во второто додадоа уште 28 поени.
Латрел Митчел го постигна првиот есеј (10′) и првата конверзија на мечот. Во продолжение, задолжен за шутевите беше Адам Рејнолдс, кој имаше пет конверзии и еден пенал.
Освен Митчел, во листата на поентерите се запишаа уште Дане Гагаи (23′), Кемпбел Греам (37′, 62′), Хаме Селе (44′), Алекс Џонстон (55′, 60′) и Таане Милне (68′).
Со натпревар повеќе во однос на конкурентите, Рабитохс го заземаат четвртото, а Бронкос – претпоследното место на табелата.
