По вторпат во два дена, во грузискиот Бакуријани се одржаа трките во сноуборд крос во рамките на Светскиот куп во оваа дисциплина.
Кај дамите, денес славеше светската шампионка, Шарлот Бенкс, која во големото финале ги порази Клои Треспеуш, Феј Џулини и Микела Мојоли.
Италијанката, иако беше четврта, освои доволен број на бодови за да ја подели првата позиција во Светскиот куп со вчерашната победничка – Ева Самкова.
Имено, Самкова беше најбрза во малото финале, оставајќи ги зад себе Манон Петит Ленуар, Линдзи Џакобелис и Жулија Переира де Соуза.
Кај мажите, Италијанецот Омар Визинтин дојде до првата победа после 2014, откако во големото финале беше подобар од Кале Коблет, од Алесандро Хемерле и од Лоренцо Сомарива.
Распоредот во малото финале гласеше: Ник Баумгартнер, Глен де Блоис, Кевин Хил и Адам Диксон.
Од друга страна, најголемо разочарување на денот беше вчерашниот победник, Елиот Грондан, кој отпадна во осмина-финалето и на тој начин се оддалечи од титулата.
📸 David Lechthaler / instagram
