Единствениот овосезонски божиќен натпревар во НФЛ, а воедно и прв од 16. коло, го одиграа Њу Орлеанс Сеинтс и Минесота Викингс.
Накрај, Сеинтс го запишаа единаесеттиот овосезонски триумф и ја прекинаа својата негативна серија од два врзани порази. Конечниот резултат изнесуваше 52-33.
Одбраната на Минесота допушти 133 јарди со пробивање во првата четвртина што е најголем број на допуштени јарди со пробивање за нив во една четвртина во последните 29 години.
Со вкупните 216 освоени јарди во првата четвртина, Сеинтс поставија нов рекорд во овој сегмент од 1991 наваму.
На денешниот меч, квотербекот на Сеинтс, Дру Брис, имаше 19/26 обиди за додавање и 311 освоени јарди. Со овие бројки, Брис стана првиот играч во историјата на НФЛ со над 80 000 освоени јарди со додавање.
Најзаслужен за победата на Сеинтс беше Алвин Камара, кој истрча 155 јарди и постигна шест тачдауни со пробивање. Камара се запиша во историјата како прв играч со шест тркачки тачдауни на еден меч, после Ерни Неверс на 28 ноември 1929!
Освен него, уште еден тачдаун забележа Тајсом Хил.
Тачдауните за Викингс ги постигнаа Далвин Кук, Мајк Бун, Ерв Смит (х2) и Адам Тилен.
Со овој триумф, Њу Орлеанс стигна до учинок од 11-4 за доближување до врвот на НФК, додека Минесота падна на 6-9 и се опрости од плејофот.
Во соработка со НФЛ Македонија
