Се повеќе стружани, на велосипед, ја возат рутата околу Охридско езеро која изнесува 90км.
Рутата околу езеро пред 10 години први почнаа да ја промовираат неколку ентузијасти од Струга-Стефчо Рафто,Никола Кукунеш,Виктор Паун,Коста Хиохи… Стружани поттикнати од сликите на социјалните мрежи и поддршката од поискусните велосипедисти почнаа редовно да возат велосипед околу езеро со задолжително кафенце и прошетка низ Поградец и Тушемиште.
,,Должината е голема,90км ,а и височините за искачување до Ќафасан и потоа од Свети Наум до Љубаништа се долги и стрмни и не се лесни за искачување,посебно за рекреативци.Најдобро е да се вози рано наутро ,а оние кои имаат помалку кондиција и послаби велосипеди да прават паузи бидејќи најголем дел од патот се вози на сонце“- изјави Виктор Пауноски од Rupicapra MTB Struga еден од поискусните велосипедисти во Струга.
Патеката од Ќафасан до Свети Наум е безбедна бидејќи има обележана и заштитена велосипедска патека. За помалку искусните и со помала кондиција велосипедисти,најинтересно е возењето од Ќафасан преку Поградец до Свети Наум,па од тука со брод до Охрид и назад на точак во Струга.
