По завршувањето на регуларната Чемпионшип сезона, тимовите од третото до шестото место се соочуваат во меѓусебен плејоф за да се одреди третиот патник во Премиер лигата.
Свонси на магичен начин, оставајќи го Нотингем зад себе, успеа да се прикраде до шестото место и да избори полуфинале против третопласираниот Брентфорд.
На својот „Либерти Стадиум“ во Велс, денес го одиграа првиот полуфинален дуел кој заврши со резултат од 1-0 во корист на Свонси.
По сиромашното прво полувреме, следуваше возбудливо второ во коешто Свонси доби пенал во 64. минута. Андре Ају ја прифати одговорноста за изведување, но неговиот удар беше запрен од голманот Давид Раја. Само две минути подоцна, судијата Кит Страуд донесе доста контроверзна одлука давајќи му црвен картон на дефанзивецот на Брентфорд, Рико Хенри, за навидум чист старт.
Во 82. минута Андре Ају ја исправи својата грешка забивајќи прекрасен погодок од полуволеј што заврши во горниот лев голмански агол. Накрај, овој гол се испостави како единствен на мечот.
Интересен податок е дека тренерот на Свонси, Стив Купер, не направи ниту една измена во ова полуфинале.
Реваншот ќе се одигра на 29 јули (среда) со почеток од 20:45 часот. Воедно, тоа ќе биде последниот натпревар одигран на стадионот „Грифин Парк“, кој од наредната сезона ќе биде заменет со новиот „Брентфорд Комунити Стадиум”. Имено, Брентфорд настапуваше на „Грифин Парк“ уште од 1904 година.
