Струмица и Вардар ќе играат во финалето на 29-от Куп на Македонија во одбојка чијшто завршен турнир се одржува во Кавадарци.
Струмичани ја совладаа Шкендија со 3:0, по сетови 25:18, 25:18 и 25:12 и ќе се обидат да ја одбранат двојната круна, да ја освојат осмата куп – титула во послендите десетсезони и 16-от пехар во македонската одбојка. Злобин освои 19, Бен Таклеб 12, Меирелеш 10, а Милев 9 поени за бранителот на двојната круна, а Зеновиќ со 15 и Андонов и Меденица со 7 беа најефикасни кај Шкендија. Вардар, пак, во полуфиналето беше подобар од Универзитет во Тетово со 3:2, по сетови 21:25, 25:23, 25:20, 19:25 и 18:16. Блажовски заработи 25 поени, а Џирлиќ 15 за рвено – црните одбојкари, коишто в недела ќе играат за вториот пехар во купот откако ја освоија двојната круна во 2013-та година.
Во денешните полуфинални дуели во женска конкуренција со преноси на МТВ3 ќе играат: бранителот на титулата, Јанта волеј Кисела вода против финалистот од 2019-та, Наковски волеј (15:55 часот), како и победникот истата година и лидер сезонава во првенството, Работнички Скопје против Струмица жени (18.55 часот).