Како дел од поранешната Југославија, Македонија има вкупно осум медалисти на Летните Олимписки Игри.
Сепак, откако ја доби својата независност, нашата држава се оддалечи од олимписките одличја.
Имено, единствен освојувач на олимписки медал беше натурализираниот борач, Магомед Ибрагимов (по потекло од Азербејџан), кој се закити со бронза на ЛОИ 2000 во Сиднеј.
Македонија чекаше повеќе од две децении за да го добие вториот медал на едни Олимписки Игри.
Овој пост го прекина Дејан Георгиевски, кој освои сребро на ЛОИ 2020 во Токио во теквондо во категоријата 80+ кг.
На главниот турнир, Георгиевски во осминафиналето го изненади актуелниот светски првак, Кубанецот Рафаел Алба Кастиљо, поразувајќи го со 11-8.
Во четвртфиналето следуваше борба со африканскиот полуфиналист Сејду Гбане од Брегот на Слоновата Коска, кој беше надмудрен во тактичка пресметка со 9-4.
Нашиот олимпиец во полуфиналето славеше со 12-6 над Кјо Дон Ин од Јужна Кореја и на тој начин закажа битка за златото против главниот фаворит, Владислав Ларин, во која загуби со 13-9.
Имено, Георгиевски беше знаменосец на отварачката церемонија на ЛОИ 2020, а воедно и единствен Македонец што исполни норма за натпреварување на овој глобален настан.
Македонскиот теквондист ја освои нормата на Европскиот олимписки квалификациски шампионат во Софија, совладувајќи го тогашниот актуелен олимписки шампион, Радик Исаев од Азербејџан, со конечни 13-6.
Софија се покажа како најуспешна дестинација во досегашната кариера на Георгиевски, поради фактот дека таму освои пет од вкупните девет златни медали во неколку натпреварувања – Софија Опен (2017, 2018 и 2020), Европски олимписки шампионат (2017) и Мулти Европски Игри (2019).
На бугарско тло, односно во Пловдив, во 2018, Македонецот доби уште едно злато за освојувањето на Мулти Европските Игри, а исто така беше шампион на Грис Опен (2018), на Туркиш Опен (2019) и на Словенија Опен (2020).
Единствената бронза на Георгиевски потекнува од Туркиш Опен во 2018, а трите сребрени медали ги доби на Медитеранските игри во Тарагона во 2018, на Србија Опен во Белград во 2018 и на Европскиот клупски шампионат во Солун во 2019.
Во пресрет на ЛОИ 2020, како што е наведено на официјалната веб-страна на Токио 2020, желбата на Георгиевски била да освои медал.
Нашиот најуспешен теквондист е роден во Скопје на 8 мај 1999 и членува во теквондо клубот Бутел, каде што е трениран од Дарко Костовски.
