Дербито на триесет и првото коло од грчката Супер лига 2 Север беше воедно и дерби на областа Тесалија.
Имено, домашниот состав на Ники Волос ремизираше со 1-1 против локалниот ривал – АЕЛ Лариса.
За двете екипи, ова беше осми меѓусебен дуел во дваесет и првиот век и прв одигран на стадионот ,,Пантесалико” после 18 ноември 2012.
Избраниците на Алекос Боснијадис дојдоа до почетно водство уште во шестата минута, откако по четврт пат во сезоната, во листата на стрелците се запиша Џозете Миранда.
Сепак, на стартот на второто полувреме, клубот од Лариса израмни на 1-1 преку својот најдобар голгетер, Мариос Огбое (52′), кој беше прецизен од белата точка.
На табелата, АЕЛ го зазема второто место и на три кола пред крајот, сè уште има теоретски шанси за промоција, додека Ники Волос се наоѓа на третата позиција.
