Овогодинешното Светско првенство во алпско скијање започна три дена подоцна од планираното, поради временските услови во Кортина д’Ампецо.
Во женска конкуренција, денешната прва трка беше во супервелеслалом, каде што, до титулата ,,светска шампионка” дојде Лара Гут-Бехрами. Швајцарката е водечка во вкупниот поредок на истата дисциплина во Светскиот куп, а денешното злато беше нејзино прво на Светските првенства.
Нејзината сонародничка Корин Сутер, која беше ,,бронзена” на СП 2019 во Оре, денес дојде до сребрениот медал со заостаток од 34 стотинки.
Микаела Шифрин (+0,47) не успеа да ја одбрани титулата од претходното СП, но го освои осмиот светски медал во својата кариера.
Само шест стотинки позади неа доцнеше Естер Ледецка, а пласман во првите десет изборија уште Кајса Викоф Ли (+0,65), Мари-Мишел Гањон (+0,78), Тамара Типлер (+0,87), Мишел Жизен (+0,89), Петра Влхова (+0,90) и Федерика Брињоне (+1,09).
📸 olympicchannel.com
