Иако почетокот беше планиран за изминатиот понеделник, Светското првенство во алпско скијање во Кортина д’Ампецо започна денес.
Прв настан во машка конкуренција, исто како и кај дамите, беше трката во супервелеслалом.
Поради еден исклучително изискателен свијок, првите тројца скијачи на стартот, Кристијан Валдер, Лоик Мејар и Мауро Кавиецел, не ја завршија трката, но им послужија како пример на наредните конкуренти.
Накрај, за првпат во кариерата, со злато од Светските првенства се закити водечкиот во генералниот пласман во оваа дисциплина – Винсент Крихмајер (1:19,41).
На второто место се пласираше Ромед Бауман (+0,07), кој стана првиот скијач во историјата што освоил светски медал претставувајќи две различни земји. Имено, 35-годишникот денес настапуваше за Германија, а на СП 2013, освои бронза во алпската комбинација во дресот на родната Австрија.
Денешниот подиум го коментираше водечкиот во вкупниот поредок на Светскиот куп, Алексис Пантуро (+0,38), кој освои медал за првпат во супервелеслалом.
Сензационалниот Канаѓанец, Броуди Сегер (+0,42), го пропушти подиумот за само четири стотинки, а бранителот на титулата, Доминик Парис (+0,55), заврши на петтото место.
Во продолжение, пласман во првите десет изборија уште: Матијас Мајер (+0,60), Матје Баје (+0,72), Тревис Генонг (+0,75), Андреас Сандер (+0,88) и Беат Фојц (+0,93).
📸 APA / GEORG HOCHMUTH
