Првиот овосезонски натпреварувачки викенд во Винтерберг (Германија), од Светскиот куп во санкање на вештачки патеки, се одржа на 11 и на 12 февруари.
Во женски дубл, Џесика Дегенхардт и Шејен Розентал (1:28,288) и’ ставија крај на мини-серијата од две победи на Андреа Фетер и на Марион Оберхофер (+0,246), кои завршија како трети, а второто место го освоија Зелина Егле и Лара Михаела Кип (+0,220).
Во машки двојки, по третпат сезонава славеа Тобијас Вендл и Тобијас Арлт (1:27,141), а на подиумот се пласираа уште Тони Егерт и Саша Бенекен (+0,430), односно Мартинш Ботс и Робертс Плуме (+0,500).
До третата последователна победа во индивидуална машка конкуренција стигна Макс Лангенан (1:45,687), кој ги натсанка Јонас Милер (+0,300) и Феликс Лох (+0,322).
Од друга страна, кај дамите, Јулија Таубитц (1:51,683) и Ана Берајтер (+0,208) изборија 1-2 триумф за Германија, а трета беше Емили Свини (+0,355).
Цел викенд беше завршен со третите овосезонски спринтови, кои воедно ги открија и првите освојувачи на мал кристален глобус во оваа дисциплина.
Имено, со победи се закитија Макс Лангенан, Тобијас Вендл/Тобијас Арлт, Јулија Таубитц и Анда Упите/Санија Озолина.
Од нив, титула освоија Таубитц и дуото Вендл/Арлт, а круната кај женскиот дубл ја поделија Егле/Кип и Фетер/Оберхофер.
Што се однесува до машката индивидуална конкуренција, новиот спринт-првак е истовремено и лидерот во генералниот поредок – Доминик Фишналер.
