Синоќа Брентфорд, со победата над Свонси, го осигури својот пласман на „Вембли“ во финалето на плејофот на Чемпионшип што го одредува третиот патник во Премиер лигата.
Денес го добивме и неговиот противник. Имено, во второто полуфинале, силите ги одмерија Фулам и Кардиф. На првиот натпревар во Велс, Фулам славеше со 0-2 благодарение на головите на Џош Онома (49′) и Неескенс Кебано (90+1′).
На реваншот на „Крејвен Котиџ“ во Лондон, Кардиф одлично го започна своето враќање со голот на Куртис Нелсон во осмата минута. Сепак, Фулам го врати резултатскиот егал неполна минута подоцна преку погодокот на Кебано. Веднаш потоа падна темпото на игра и до крајот на полувремето, резултатот остана непроменет.
Кардиф го врати своето водство на овој натпревар во 47. минута преку нововлезениот Ли Томлин, кој го постигна својот деветти гол сезонава и го постави конечниот резултат од 1-2. Фулам, иако загуби, сепак поради подобриот вкупен резултат (3-2) избори пласман во финалето.
„Црно-белите“ ќе го одиграат финалето против Брентфорд во вторник (4 август) во 20:45 часот.
