Српскиот великан, Партизан од Белград, денес го претстави и своето второ засилување за наредната сезона, после ангажманот на Александар Филиповиќ.
Имено, во составот на новиот тренер, Илија Столица, од вечерва ќе се придружи и интернационалецот од Република Зелен ‘Рт – Патрик Андраде.
Андраде е играч за врска, кој потпиша договор на три години со ,,Црно-белите”, откако го напушти азербејџанскиот клуб, Карабаг, каде што помина две години.
Најголемиот дел од сениорската кариера, Андраде го помина во Португалија, бранејќи ги боите на Ривеирао и на Мореирензе со позајмици во Жоане, во Фамаликао и во Салгеирош.
Пред да се пресели во Азербејџан, 29-годишниот фудбалер помина уште две години во Варна (Бугарија), носејќи го дресот на Черно Море.
Освен Андраде, за Партизан настапува уште еден репрезентативец на Република Зелен ‘Рт, Рикардо Гомеш, кој со 38 погодоци во сите натпреварувања, го скрши клупскиот рекорд на Матеја Кежман за најмногу голови во една сезона.
Во врска со својот сонародник, Рикардо, за официјалната страна на Партизан, изјави:
,,Мислам дека тој има добар квалитет, одличен шут со лева нога, завршно додавање и чување на топката и мислам дека тоа е стилот, кој тренерот го сака од нас засега. Среќен сум и малку сум возбуден дека ќе ни се придружи.”
Моментално, целата екипа на Партизан се наоѓа на подготовки во Птуј (Словенија), каде што утре во 11 часот ќе биде официјално претставено и новото засилување.
