Елиминацијата од квалификациите за Лигата на конференциии, како и лошиот старт на сезоната, беа доволни за Герман Бургос да добие отказ од клупата на Арис.
Неговиот помошник, Апостолос Терзис, го предводеше клубот во последните два натпревари и избори реми против градскиот ривал ПАОК (0-0) и победа над Астерас Триполис (0-2).
Сепак, челниците на грчкиот клуб одлучија да назначат нов менаџер за претстојниот дел од сезоната.
Имено, нов предводник на момците од стадионот ,,Клеантис Викелидис” ќе биде искусниот Алан Пардју.
Пардју, во тренерската кариера, доби награда за менаџер на сезоната во англиската Премиер лига во Њукасл, а како водач на Вест Хем и на Кристал Палас стигна до финалето на ФА Купот.
Надвор од Англија, Англичанецот стоеше на кормилото на АДО Ден Хааг (2019/20) и на ЦСКА Софија (2022), а во Солун потпиша договор на една година со можност за продолжување.
Арис подготвува значително засилена екипа во која, освен домашните играчи, има и неколку ѕвезди како Жервињо, Андре Греј, Рафаел Камачо, Хуан Итурбе и Мозес Одубаџо.
