Англискиот нисколигашки фудбал ги пишува најубавите бајки, а исто така ги приредува и највозбудливите случувања на теренот.
Последното коло од Лиг 2 ја донесе најенормната можна неизвесност и одговори многу прашања.
До најголемиот успех во својата историја дојде првиот вегански клуб во светот, Форест Грин Роверс, кој потекнува од местото со пет илјади жители – Неилсворт.
Форест Грин ја освои титулата во четвртата лига на гол-разлика (+31 наспроти +24) во однос на вицешампионот Ексетер, иако имаа ист број на освоени поени.
Во последниот меч, новите прваци одиграа нерешено со 2-2 на гостувањето во Мансфилд, кој со освоениот бод го загарантира седмото место, односно последното што води во плејофот.
На мечот, Мансфилд двапати стекнуваше водство преку Метју Лонгстаф (17′) и преку Натаниел Џордан Боувери (79′), додека гостите од Глостершир израмнуваа благодарение на Ебу Адамс (64′) и на резервистот од клупата – Џош Марч (81′).
Второпласираниот Ексетер ја загуби битката за титулата поради фактот дека денес претрпе минимален пораз од Порт Вејл со 0-1, иако доминираше во текот на цел меч.
Победничкиот погодок за Порт Вејл го заби Џејмс Вилсон (36′), а новите три поени беа доволни за неговиот тим да се искачи на петтото место и во плејофот да се соочи со Свиндон.
Свиндон, како денешен ривал го имаше Волсал и го порази со 0-3, откако прецизно стрелаа Хари МекКирди (5′) и Џек Пејн (25′, 45+2′).
Најголемата драма ја приредија екипите, кои завршија на третото и на четвртото место, односно Бристол Роверс и Нортемптон Таун.
Нортемптон мораше да се задоволи само со четвртото место и да ја бара шансата за промоција преку доигрувањето, иако запиша победа од 1-3 на гостувањето кај Бероу.
За популарните „Коблерс“, брзи голови постигнаа Сем Хоскинс (5′, 22′) и Фрејзер Хорсфал (14′), а конечниот резултат го постави Џош Кеј (45′) со кобниот погодок за победничкиот состав.
Имено, Нортемптон отпадна од позицијата што води директно во третиот ранг само поради помал број на дадени погодоци од Бристол Роверс, иако и двете екипи имаа ист број на поени и иста гол-разлика.
Неверојатното сценарио беше изведено на „Меморијал Стадиум“ во Бристол, каде што Роверс го декласираа веќе релегираниот Сканторп Јунајтед со убедливи 7-0 и на пет минути пред крајот му ја „украдоа“ промоцијата на Нортемптон.
Навивачите не можеа да ги контролираат своите емоции и направија инвазија на теренот што резултираше со неколкуминутен прекин и со закана за можен рестарт на цел натпревар, но сепак, накрај сè се заврши на добар начин за симпатизерите на Бристол Роверс.
На овој историски натпревар, автогол постигна Оливер Лобли (18′), по двапати во листата на стрелците се запишаа Арон Колинс (63′, 79′) и Ентони Еванс (62′, 76′), а по еднаш реализираа Конер Тејлор (22′) и Елиот Андерсон (85′).
