Пролетта е пред вратите, па луѓето ширум светот планираат посети во цветните паркови за да уживаат во благодатите на најубавото годишно време. Една од најпознатите такви атракции е ботаничката градина Куекенхоф, интернационалниот парк на цвеќињата во Холандија кој датира од 1949-та година.
Сместен е на самиот брег на гратчето Ласе, меѓу Амстердам и Хаг, Куекенхоф е најголема градина на светот која содржи 800 видови на лалиња по кои е познат регонот. Локалитетот исто така е населен со полиња од зумбили, нарциси, рози и ириси.
Повеќе од седум милиони цвеќиња расцветуваат секоја пролет на преку 32 хектари земјиште, правејќи го Куекенхоф најпосакувана дестинација за сите љубители на цвеќиња.
Паркот секоја година одново тематски се уредува, а сета убавина на амбиентот ја дополнуваат старите, повеќевековни стебла, канали, водопади и фонтани.
Ова живописно место е отворено само осум недели годишно, а за тоа време го посетуваат околу 800.000 посетители.
Инаку, лалињата дошле во Холандија од Отоманското царство, денешна Турција, во текот на 16-тиот век. Подоцна, во 1857-ма година во Холандија е донесено решение за надгледување на трговијата со цвеќе.
Најживописниот парк со цвеќиња во ХоландијаПочнале да се одгледуваат наменски, не само лалиња, туку и нарциси, зумбули и други цвеќиња. На тој начин се создадени илјадници цветни орнаменти кои подоцна послужиле за создавање на величенствени паркови, а сеченото цвеќе почнало да се извезува.
