Најстариот прволигашки, а воедно и професионален шкотски фудбалски клуб е Килмарнок, основан на 5 јануари 1869 година.
Пред две сезони, популарните ,,Кили” завршија на третото место на табелата, но оттогаш наваму, сè одеше во надолна линија.
Пред неполни две недели, тренерот Алекс Даер го напушти клубот поради лошите резултати, иако имаше договор за уште една сезона.
На негово место, денес беше доведен искусниот Томи Рајт, кој потпиша договор до летото 2023 година.
Рајт е поранешен репрезентативен голман на Северна Ирска, кој ,,плива” во тренерските води уште од 2003 година.
На почетокот, Рајт предводеше аматерски екипи како Лимавади Јунајтед, Балимена Јунајтед и Лисбурн Дистилери, пред да потпише професионален договор со шкотскиот прволигаш Ст. Џонстон во 2013.
Како предводник на претставниците на Перт, Рајт влезе во клупските анали како најуспешен тренер, пред сè поради единствениот освоен Шкотски Куп во историјата на Ст. Џонстон во 2013/14.
Од мај 2020 година, Северноирецот остана без тренерски ангажман и следните успеси ќе ги бара од кормилото на Килмарнок.
,,Апсолутно сум почестен што ќе бидам нов тренер на Килмарнок. Тоа е одлична прилика за мене. Ова е навистина добар клуб со добри луѓе и бев импресиониран кога зборував со нив, така што одлуката да го прифатам новиот ангажман беше лесна.” – се огласи Рајт за официјалната веб-страна на Килмарнок.
📸 kilmarnockfc.co.uk
