Областа Мореј, во северниот дел на Шкотска, односно во регионот Шкотски Гори, е местото во кое се наоѓа градот Елгин.
Елгин е административен и комерцијален центар на Мореј, а во своја сопственост брои околу 24 760 жители според проценките од 2016.
Сепак, во спортската јавност, ова населено место е познато како дом на најсеверниот професионален клуб од Велика Британија – Елгин Сити ФК.
Елгин Сити ФК е основан на 10 август 1893 од фузијата на две локални екипи – Елгин Роверс и Вејл оф Лоси.
Во минатото, истото име го носеле уште два клуба, формирани во 1879 и во 1884, кои имале краток животен век.
Од самото основање, Елгин бил дел од лигата на Шкотските Гори, односно на Хајленд Лиг, каде што останал сè до 2000 година.
За првпат, шампион на Хајленд Лиг, Елгин бил во 1932, а до 1990 освоил уште тринаесет други наслови.
Во сезоната 1992/93, ,,Црно-белите” стигнале до петнаесеттата титула, но истата им била врачена на Коув Ренџерс, откако во последното коло, за Елгин настапиле два играчи, коишто биле суспендирани.
Во 1968, Елгин, како член на Хајленд Лиг, се пласирал во четвртфиналето на Шкотскиот куп што сè уште претставува рекордно достигнување за клуб, кој дефилира во оваа лига.
Сепак, првиот трофеј во витрините на Елгин датира од 1898/99, кога го освоил Купот на северна Шкотска и станал првиот тим надвор од градот Инвернес што се закитил со оваа титула. Во финалето, како поразен состав заминал Клахнахадин, кој загубил со 2-1.
На втората регионална титула, навивачите на најсеверниот британски клуб чекале до 1924, а заклучно со 2014, Елгин го освоил Купот на северна Шкотска вкупно осумнаесет пати.
Претставниците на Мореј влегоа во професионалниот шкотски фудбал во 2000 година, кога шкотската Премиер лига беше зголемена од десет на дванаесет екипи.
Заедно со Петерхед, Елгин беше внесен во Дивизија 3, односно во актуелната Лиг 2 што е еднакво на четврта лига.
Веќе повеќе од две децении, најсеверниот британски клуб се натпреварува во четвртата шкотска лига, во која, досега учествуваше само во четири неуспешни плејоф обиди за промоција (2011/12, 2012/13, 2015/16 и 2020/21).
Уште од 20 август 1921, Елгин ги игра домашните натпревари на ,,Бороу Бригс”, кој има капацитет од 4520 гледачи.
Со промоцијата во професионалните рангови, стадионот добил 478 седишта, кои претходно биле имплементирани на ,,Ст. Џејмс Парк”, односно на стадионот на англискиот премиерлигаш – Њукасл Јунајтед.