МЗТ Скопје Аеродром го победи Работнички со 84:82 во најголемото македонско кошаркарско дерби, кое за прв пат се играше во странство. Ова беше дуел во рамките од Втората АБА лига, се играше во Сараево, а во драматична завршница, на крајот се радуваа аеродромци.
Бојан Крстевски со 19 поени беше најефикасен кај МЗТ, а со двоцифрен учинок кај победничкиот тим беа уште и Бојиќ и Стојановски кои завршија со по 14 поени. Кај Работнички најефикасен беше Питс со 20 поени, а Младеновски постигна 17 поени.
МЗТ сега е со учинок пет победи и три порази, колку што имаат уште пет клуба, на делба од второто до седмото место на табелата. Работнички е предпоследен со само две победи и шест порази. Во следното коло, аеродромци во сабота ќе играат против Ловќен, а Работнички за противник ќе го има тимот на Сутјеска.