Утре екипата на РК Струга во првиот официјален натпревар во 2021 во рамките на Купот на Македонија ќе гостува во Ресен против екипата на РК Преспа. Ресенчани секогаш биле незгоден ривал за Стружани, иако фаворитската улога ја има тимот на Струга кој пролетва треба да игра во плејофот на Македонската Суперлига со најдобрите македонски екипи.
Во подготвителниот период тимот кој од клупата го предводи Наум Танески одигра квалитетно и забележа 4 победи: два пати против екипата на Прилеп, еднаш против Тиквеш и еднаш против Еурофарм Пелистер 2 во Битола. Единствениот пораз го запиша дома против вториот тим на Битолчани. Дуелот од Купот на Македонија треба да биде загревање пред стартот на пролетниот дел од суперлигата.
