Второпласираниот славеше над четвртопласираниот тим во најсилната женска македонска одбојкарска конкуренција во последниот натпревар од петтото коло во Втората фаза-1.
Јанта Волеј Кисела Вода вторпат сезонава победи на гостувањето кај Струмица жени, по пет сета есеноска, овој пат со одиграни четири (17:25, 24:26, 25:19, 17:25), со што скопските одбојкарки го забележаа десеттиот триумф во 11-от натпревар во Првата лига.
Сепак, дури и со таков биланс, поради помал број бодови, не можеа да го преземат првото место од Вардар жени 2019, којашто е единствена екипа досега што се радуваше против Јанта Волеј Кисела Вода.
Составот на Струмица жени, пак, во претходното коло победи токму против водечките вардарки, но не успеа да ја задржи серијата од три успеси по ред, а тоа значи дека остана на четвртата позиција.
Предноста од две победи во однос на Наковски волеј изгледа комотно од аспект на трката за полуфинале од разигрувањето иако теоретски не е се готово, додека, пак, заостанувањето зад третопласираниот Работнички Скопје е еден триумф и три бода.
До крајот на оваа фаза од натпреварувањето има уште пет рунди, така што се уште се можни промени без оглед што досегашниот дел од сезоната го диференцираше квалитетот дури и во рамки на најдобрата четворка.