Натпреварувањата во нордиска комбинација се составени од две серии, каде што едната е во ски скокови, а другата во скијачко трчање.
Досега, оваа дисциплина беше само машка во рамките на Светскиот куп. Сепак, од денес, односно од тековната сезона 2020/21, истата почна да се практикува и во женска конкуренција.
На денешната програма беше дебитантското женско натпреварување, одржано во Рамзау, Австрија.
Во првата серија, на скокалницата (ГС 98), најдобра беше Норвежанката Гида Вестволд Хансен, која успеа да избори огромна стартна предност во пресрет на втората серија во однос на сите конкурентки. Првите десет натпреварувачки заостануваа под една минута, а најдобри од нив беа Вероника Џанмоена (+0:26), Анју Накамура (+0:29), Клаудија Пуркер (+0:34) и Сигрун Клајнрат (+0:38).
Во втората серија следуваше скијачкото трчање на пет километри, каде што најзначаен напредок направи Тара Герагти-Моутс. Американката се испиша во историјата како прва победничка на едно натпреварување од Светскиот куп, притоа надоместувајќи стартен заостаток од цели 39 секунди. Освен неа, на подиумот се пласираа Гида Вестволд Хансен (+1,5) и Анју Накамура (+13,0).
На првото натпреварување, во првите десет, освен горенаведените три скијачки, завршија уште: Марте Леинанд Лунд (+1:05,8), Сигрун Клајнрат (+1:12,6), Лиза Хирнер (+1:25,8), Мари Леинанд Лунд (+1:43,2), Вероника Џанмоена (+1:43,5), Аника Зиф (+1:59,8) и Анастасија Гончарова (+2:10,3).